Лекция 22 февраля 2021 года. Псалом 147-148 и ответы на вопросы

Ѱало́мъ 147 MP3
1 Похвалѝ, ї҆ер҇ли́ме, гд҇а, хвалѝ бг҃а твоего̀, сїѡ́не: 2 ѩ҆́кѡ ѹ҆крѣпѝ верєѝ вра́тъ твои́хъ, блг҇вѝ сы́ны твоѧ҄ въ тебѣ̀. 3 Полага́ѧй предѣ́лы твоѧ҄ ми́ръ, и҆ тѹ́ка пшени́чна насыща́ѧй тѧ̀: 4 посыла́ѧй сло́во своѐ землѝ, до ско́рости тече́тъ сло́во є҆гѡ̀, 5 даю́щагѡ снѣ́гъ сво́й ѩ҆́кѡ во́лнѹ, мглѹ̀ ѩ҆́кѡ пе́пелъ посыпа́ющагѡ, 6 мета́ющагѡ го́лоть сво́й ѩ҆́кѡ хлѣ́бы: проти́вѹ лица̀ мра́за є҆гѡ̀ кто̀ постои́тъ; 7 По́слетъ сло́во своѐ, и҆ и҆ста́етъ ѧ҆̀: дхне́тъ дѹ́хъ є҆гѡ̀, и҆ потекѹ́тъ во́ды. 8 Возвѣща́ѧй сло́во своѐ ї҆а́кѡвѹ, ѡ҆правда҄нїѧ и҆ сѹдбы҄ своѧ҄ ї҆и҃леви: 9 не сотворѝ та́кѡ всѧ́комѹ ѩ҆зы́кѹ, и҆ сѹдбы҄ своѧ҄ не ѩ҆вѝ и҆̀мъ.

Ѱало́мъ 148 MP3
1 Хвали́те гд҇а съ нб҃съ, хвали́те є҆го̀ въ вы́шнихъ. 2 Хвали́те є҆го̀ всѝ а҆́гг҃ли є҆гѡ̀: хвали́те є҆го̀, всѧ҄ си҄лы є҆гѡ̀. 3 Хвали́те є҆го̀, со́лнце и҆ лѹна̀: хвали́те є҆го̀ всѧ҄ ѕвѣ́зды и҆ свѣ́тъ. 4 Хвали́те є҆го̀, нб҃са̀ нб҃съ и҆ вода̀, ѩ҆́же превы́ше небе́съ. 5 Да восхва́лѧтъ и҆́мѧ гд҇не: ѩ҆́кѡ то́й речѐ, и҆ бы́ша: то́й повелѣ̀, и҆ созда́шасѧ. 6 Поста́ви ѧ҆̀ въ вѣ́къ и҆ въ вѣ́къ вѣ́ка: повелѣ́нїе положѝ, и҆ не ми́мѡ и҆́детъ. 7 Хвали́те гд҇а ѿ землѝ, ѕмі́еве и҆ всѧ҄ бє́здны: 8 ѻ҆́гнь, гра́дъ, снѣ́гъ, го́лоть, дѹ́хъ бѹ́ренъ, творѧ҄щаѧ сло́во є҆гѡ̀: 9 го́ры и҆ всѝ хо́лми, древа̀ плодонѡ́сна и҆ всѝ ке́дри: 10 ѕвѣ́рїе и҆ всѝ ско́ти, га́ди и҆ пти҄цы перна҄ты: 11 ца́рїе зе́мстїи и҆ всѝ лю́дїе, кнѧ҄зи и҆ всѝ сѹдїи҄ зе́мстїи: 12 ю҆́нѡши и҆ дѣ҄вы, ста́рцы съ ю҆́нотами. 13 Да восхва́лѧтъ и҆́мѧ гд҇не: ѩ҆́кѡ вознесе́сѧ и҆́мѧ тогѡ̀ є҆ди́нагѡ, и҆сповѣ́данїе є҆гѡ̀ на землѝ и҆ на нб҃сѝ. 14 И҆ вознесе́тъ ро́гъ люді́й свои́хъ: пѣ́снь всѣ҄мъ прпдбнымъ є҆гѡ̀, сыновѡ́мъ ї҆и҃лєвымъ, лю́демъ приближа́ющымсѧ є҆мѹ̀.
Ответы на вопросы