Из лекции 14 декабря 2020 года.
Ѱалти́рь 131:1-18:
1 Помѧнѝ, гд҇и, дв҃да и҆ всю̀ кро́тость є҆гѡ̀: 2 ѩ҆́кѡ клѧ́тсѧ гд҇еви, ѡ҆бѣща́сѧ бг҃ѹ ї҆а́кѡвлю: 3 а҆́ще вни́дѹ въ селе́нїе до́мѹ моегѡ̀, и҆лѝ взы́дѹ на ѻ҆́дръ посте́ли моеѧ̀: 4 а҆́ще да́мъ со́нъ ѻ҆чи́ма мои́ма, и҆ вѣ́ждома мои́ма дрема́нїе, и҆ поко́й скранїа́ма мои́ма: 5 до́ндеже ѡ҆брѧ́щѹ мѣ́сто гд҇еви, селе́нїе бг҃ѹ ї҆а́кѡвлю. 6 Сѐ, слы́шахомъ ѧ҆̀ во є҆ѵфра́ѳѣ, ѡ҆брѣто́хомъ ѧ҆̀ въ полѧ́хъ дѹбра́вы: 7 вни́демъ въ селє́нїѧ є҆гѡ̀, поклони́мсѧ на мѣ́сто, и҆дѣ́же стоѧ́стѣ но́зѣ є҆гѡ̀. 8 Воскр҇нѝ, гд҇и, въ поко́й тво́й, ты̀ и҆ кївѡ́тъ ст҃ы́ни твоеѧ̀. 9 Сщ҃е́нницы твоѝ ѡ҆блекѹ́тсѧ пра́вдою, и҆ прпдбнїи твоѝ возра́дѹютсѧ. 10 Дв҃да ра́ди раба̀ твоегѡ̀, не ѿвратѝ лицѐ пома́заннагѡ твоегѡ̀. 11 Клѧ́тсѧ гд҇ь дв҃дѹ и҆́стиною, и҆ не ѿве́ржетсѧ є҆ѧ̀: ѿ плода̀ чре́ва твоегѡ̀ посаждѹ̀ на престо́лѣ твое́мъ. 12 А҆́ще сохранѧ́тъ сы́нове твоѝ завѣ́тъ мо́й и҆ свидѣ҄нїѧ моѧ҄ сїѧ҄, и҆̀мже наѹчѹ̀ ѧ҆̀, и҆ сы́нове и҆́хъ до вѣ́ка сѧ́дѹтъ на престо́лѣ твое́мъ. 13 ѩ҆́кѡ и҆збра̀ гд҇ь сїѡ́на, и҆зво́ли и҆̀ въ жили́ще себѣ̀. 14 Се́й поко́й мо́й во вѣ́къ вѣ́ка, здѣ̀ вселю́сѧ, ѩ҆́кѡ и҆зво́лихъ и҆̀. 15 Лови́твѹ є҆гѡ̀ блг҇влѧ́ѧй блг҇влю̀, ни́щыѧ є҆гѡ̀ насы́щѹ хлѣ҄бы: 16 сщ҃е́нники є҆гѡ̀ ѡ҆блекѹ̀ во сп҇нїе, и҆ прпдбнїи є҆гѡ̀ ра́достїю возра́дѹютсѧ. 17 Та́мѡ возращѹ̀ ро́гъ дв҃дови, ѹ҆гото́вахъ свѣти́лникъ пома́занномѹ моемѹ̀. 18 Врагѝ є҆гѡ̀ ѡ҆блекѹ̀ стѹдо́мъ, на не́мъ же процвѣте́тъ ст҃ы́нѧ моѧ̀.
