Ѱало́мъ 141 MP3
1 Ра́зѹма дв҃дѹ, внегда̀ бы́ти є҆мѹ̀ въ верте́пѣ молѧ́щемѹсѧ, 2 Гла́сомъ мои́мъ ко гд҇ѹ воззва́хъ, гла́сомъ мои́мъ ко гд҇ѹ помоли́хсѧ. 3 Пролїю̀ пред̾ ни́мъ моле́нїе моѐ, печа́ль мою̀ пред̾ ни́мъ возвѣщѹ̀. 4 Внегда̀ и҆зчеза́ти ѿ менє̀ дѹ́хѹ моемѹ̀, и҆ ты̀ позна́лъ є҆сѝ стєзѝ моѧ҄: на пѹтѝ се́мъ, по немѹ́же хожда́хъ, скры́ша сѣ́ть мнѣ̀. 5 Сматрѧ́хъ ѡ҆деснѹ́ю и҆ возглѧ́дахъ, и҆ не бѣ̀ зна́ѧй менѐ: поги́бе бѣ́гство ѿ менє̀, и҆ нѣ́сть взыска́ѧй дѹ́шѹ мою̀. 6 Воззва́хъ къ тебѣ̀, гд҇и, рѣ́хъ: ты̀ є҆сѝ ѹ҆пова́нїе моѐ, ча́сть моѧ̀ є҆сѝ на землѝ живы́хъ. 7 Вонмѝ моле́нїю моемѹ̀, ѩ҆́кѡ смири́хсѧ ѕѣлѡ̀: и҆зба́ви мѧ̀ ѿ гонѧ́щихъ мѧ̀, ѩ҆́кѡ ѹ҆крепи́шасѧ па́че менє̀. 8 И҆зведѝ и҆з̾ темни́цы дѹ́шѹ мою̀, и҆сповѣ́датисѧ и҆́мени твоемѹ̀: менѐ ждѹ́тъ првдницы, до́ндеже возда́си мнѣ̀.
Ѱало́мъ 142 MP3
1 Гд҇и, ѹ҆слы́ши моли́твѹ мою̀, внѹшѝ моле́нїе моѐ во и҆́стинѣ твое́й, ѹ҆слы́ши мѧ̀ въ пра́вдѣ твое́й: 2 и҆ не вни́ди въ сѹ́дъ съ рабо́мъ твои́мъ, ѩ҆́кѡ не ѡ҆правди́тсѧ пред̾ тобо́ю всѧ́къ живы́й. 3 ѩ҆́кѡ погна̀ вра́гъ дѹ́шѹ мою̀: смири́лъ є҆́сть въ зе́млю живо́тъ мо́й: посади́лъ мѧ̀ є҆́сть въ те́мныхъ, ѩ҆́кѡ мє́ртвыѧ вѣ́ка. 4 И҆ ѹ҆ны̀ во мнѣ̀ дѹ́хъ мо́й, во мнѣ̀ смѧте́сѧ се́рдце моѐ. 5 Помѧнѹ́хъ дни҄ дрє́внїѧ, поѹчи́хсѧ во всѣ́хъ дѣ́лѣхъ твои́хъ, въ творе́нїихъ рѹкѹ̀ твоє́ю поѹча́хсѧ. 6 Воздѣ́хъ къ тебѣ̀ рѹ́цѣ моѝ: дѹша̀ моѧ̀ ѩ҆́кѡ землѧ̀ безво́днаѧ тебѣ̀. 7 Ско́рѡ ѹ҆слы́ши мѧ̀, гд҇и, и҆зчезѐ дѹ́хъ мо́й: не ѿвратѝ лица̀ твоегѡ̀ ѿ менє̀, и҆ ѹ҆подо́блюсѧ низходѧ́щымъ въ ро́въ. 8 Слы́шанѹ сотворѝ мнѣ̀ заѹ́тра мл҇ть твою̀, ѩ҆́кѡ на тѧ̀ ѹ҆пова́хъ: скажѝ мнѣ̀, гд҇и, пѹ́ть, въ ѻ҆́ньже пойдѹ̀, ѩ҆́кѡ къ тебѣ̀ взѧ́хъ дѹ́шѹ мою̀. 9 И҆зми́ мѧ ѿ вра҄гъ мои́хъ, гд҇и, къ тебѣ̀ прибѣго́хъ. 10 Наѹчи́ мѧ твори́ти во́лю твою̀, ѩ҆́кѡ ты̀ є҆сѝ бг҃ъ мо́й: дх҃ъ тво́й бл҃гі́й наста́витъ мѧ̀ на зе́млю пра́вѹ. 11 И҆́мене твоегѡ̀ ра́ди, гд҇и, живи́ши мѧ̀ пра́вдою твое́ю: и҆зведе́ши ѿ печа́ли дѹ́шѹ мою̀: 12 и҆ мл҇тїю твое́ю потреби́ши врагѝ моѧ҄ и҆ погѹби́ши всѧ҄ стѹжа́ющыѧ дѹшѝ мое́й: ѩ҆́кѡ а҆́зъ ра́бъ тво́й є҆́смь.
Ѱало́мъ 143 MP3
1 Блг҇ве́нъ гд҇ь бг҃ъ мо́й, наѹча́ѧй рѹ́цѣ моѝ на ѡ҆полче́нїе, пе́рсты моѧ҄ на бра́нь. 2 Мл҇ть моѧ̀ и҆ прибѣ́жище моѐ, застѹ́пникъ мо́й и҆ и҆зба́витель мо́й, защи́титель мо́й, и҆ на него̀ ѹ҆пова́хъ: повинѹ́ѧй лю́ди моѧ҄ под̾ мѧ̀. 3 Гд҇и, что̀ є҆́сть человѣ́къ, ѩ҆́кѡ позна́лсѧ є҆сѝ є҆мѹ̀; и҆лѝ сы́нъ человѣ́чь, ѩ҆́кѡ вмѣнѧ́еши є҆гѡ̀; 4 Человѣ́къ сѹетѣ̀ ѹ҆подо́бисѧ: дні́е є҆гѡ̀ ѩ҆́кѡ сѣ́нь прехо́дѧтъ. 5 Гд҇и, преклонѝ нб҃са̀, и҆ сни́ди: косни́сѧ гора́мъ, и҆ воздымѧ́тсѧ: 6 блеснѝ мо́лнїю, и҆ разжене́ши ѧ҆̀: послѝ стрѣ́лы твоѧ҄, и҆ смѧте́ши ѧ҆̀. 7 Послѝ рѹ́кѹ твою̀ съ высоты̀, и҆зми́ мѧ и҆ и҆зба́ви мѧ̀ ѿ во́дъ мно́гихъ, и҆з̾ рѹкѝ сынѡ́въ чѹжди́хъ, 8 и҆́хже ѹ҆ста̀ глаго́лаша сѹетѹ̀, и҆ десни́ца и҆́хъ десни́ца непра́вды. 9 Бж҃е, пѣ́снь но́вѹ воспою̀ тебѣ̀, во ѱалти́ри десѧтострѹ́ннѣмъ пою̀ тебѣ̀: 10 даю́щемѹ сп҇нїе царє́мъ, и҆збавлѧ́ющемѹ дв҃да раба̀ своего̀ ѿ меча̀ лю́та. 11 И҆зба́ви мѧ̀ и҆ и҆зми́ мѧ и҆з̾ рѹкѝ сынѡ́въ чѹжди́хъ, и҆́хже ѹ҆ста̀ глаго́лаша сѹетѹ̀, и҆ десни́ца и҆́хъ десни́ца непра́вды: 12 и҆́хже сы́нове и҆́хъ ѩ҆́кѡ новосаждє́нїѧ водрѹжє́наѧ въ ю҆́ности свое́й, дщє́ри и҆́хъ ѹ҆до́брєны, преѹкра́шєны ѩ҆́кѡ подо́бїе хра́ма: 13 храни҄лища и҆́хъ и҆спо́лнєна, ѿрыга҄ющаѧ ѿ сегѡ̀ въ сїѐ: ѻ҆́вцы и҆́хъ многоплѡ́дны, мно́жащыѧсѧ во и҆схо́дищихъ свои́хъ: воло́ве и҆́хъ то́лсти: 14 нѣ́сть паде́нїѧ ѡ҆пло́тѹ, нижѐ прохо́да, нижѐ во́плѧ въ сто́гнахъ и҆́хъ. 15 Ѹ҆бл҃жи́ша лю́ди, и҆̀мже сїѧ҄ сѹ́ть: бл҃же́ни лю́дїе, и҆̀мже гд҇ь бг҃ъ и҆́хъ.
Ответы на вопросы
