Ѱало́мъ 138 MP3:
1 Гд҇и, и҆скѹси́лъ мѧ̀ є҆сѝ и҆ позна́лъ мѧ̀ є҆сѝ: ты̀ позна́лъ є҆сѝ сѣда́нїе моѐ и҆ воста́нїе моѐ. 2 Ты̀ разѹмѣ́лъ є҆сѝ помышлє́нїѧ моѧ҄ и҆здале́ча: 3 стезю̀ мою̀ и҆ ѹ҆́же моѐ ты̀ є҆сѝ и҆зслѣ́довалъ и҆ всѧ҄ пѹти҄ моѧ҄ прови́дѣлъ є҆сѝ. 4 ѩ҆́кѡ нѣ́сть льстѝ въ ѧ҆зы́цѣ мое́мъ: сѐ, гд҇и, ты̀ позна́лъ є҆сѝ 5 всѧ҄ послѣ҄днѧѧ и҆ дрє́внѧѧ: ты̀ созда́лъ є҆сѝ мѧ̀ и҆ положи́лъ є҆сѝ на мнѣ̀ рѹ́кѹ твою̀. 6 Ѹ҆диви́сѧ ра́зѹмъ тво́й ѿ менє̀, ѹ҆тверди́сѧ, не возмогѹ̀ къ немѹ̀. 7 Ка́мѡ пойдѹ̀ ѿ дх҃а твоегѡ̀; и҆ ѿ лица̀ твоегѡ̀ ка́мѡ бѣжѹ̀; 8 А҆́ще взы́дѹ на нб҃о, ты̀ та́мѡ є҆сѝ: а҆́ще сни́дѹ во а҆́дъ, та́мѡ є҆сѝ. 9 А҆́ще возмѹ̀ крилѣ҄ моѝ ра́нѡ и҆ вселю́сѧ въ послѣ́днихъ мо́рѧ, 10 и҆ та́мѡ бо рѹка̀ твоѧ̀ наста́витъ мѧ̀, и҆ ѹ҆держи́тъ мѧ̀ десни́ца твоѧ̀. 11 И҆ рѣ́хъ: є҆да̀ тма̀ попере́тъ мѧ̀; и҆ но́щь просвѣще́нїе въ сла́дости мое́й. 12 ѩ҆́кѡ тма̀ не помрачи́тсѧ ѿ тебє̀, и҆ но́щь ѩ҆́кѡ де́нь просвѣти́тсѧ: ѩ҆́кѡ тма̀ є҆ѧ̀, та́кѡ и҆ свѣ́тъ є҆ѧ̀. 13 ѩ҆́кѡ ты̀ созда́лъ {стѧжа́лъ} є҆сѝ ѹ҆трѡ́бы моѧ҄, воспрїѧ́лъ мѧ̀ є҆сѝ и҆з̾ чре́ва ма́тере моеѧ̀. 14 И҆сповѣ́мсѧ тебѣ̀, ѩ҆́кѡ стра́шнѡ ѹ҆диви́лсѧ є҆сѝ: чѹ҄дна дѣла̀ твоѧ҄, и҆ дѹша̀ моѧ̀ зна́етъ ѕѣлѡ̀. 15 Не ѹ҆таи́сѧ ко́сть моѧ̀ ѿ тебє̀, ю҆́же сотвори́лъ є҆сѝ въ та́йнѣ, и҆ соста́въ мо́й въ преиспо́днихъ землѝ. 16 Несодѣ́ланное моѐ ви́дѣстѣ ѻ҆́чи твоѝ, и҆ въ кни́зѣ твое́й всѝ напи́шѹтсѧ: во дне́хъ сози́ждѹтсѧ, и҆ никто́же въ ни́хъ. 17 Мнѣ́ же ѕѣлѡ̀ че́стни бы́ша дрѹ́зи твоѝ, бж҃е, ѕѣлѡ̀ ѹ҆тверди́шасѧ влады́чєствїѧ и҆́хъ: 18 и҆зочтѹ̀ и҆̀хъ, и҆ па́че песка̀ ѹ҆мно́жатсѧ: воста́хъ, и҆ є҆щѐ є҆́смь съ тобо́ю. 19 А҆́ще и҆збїе́ши грѣ́шники, бж҃е: мѹ́жїе крове́й, ѹ҆клони́тесѧ ѿ менє̀. 20 ѩ҆́кѡ ревни́ви є҆стѐ въ помышле́нїихъ, прїи́мѹтъ въ сѹетѹ̀ гра́ды твоѧ҄. 21 Не ненави́дѧщыѧ ли тѧ̀, гд҇и, возненави́дѣхъ, и҆ ѡ҆ вразѣ́хъ твои́хъ и҆ста́ѧхъ; 22 Соверше́нною не́навистїю возненави́дѣхъ ѧ҆̀: во врагѝ бы́ша мѝ. 23 И҆скѹси́ мѧ, бж҃е, и҆ ѹ҆вѣ́ждь се́рдце моѐ: и҆стѧжи́ мѧ и҆ разѹмѣ́й стєзѝ моѧ҄: 24 и҆ ви́ждь, а҆́ще пѹ́ть беззако́нїѧ во мнѣ̀, и҆ наста́ви мѧ̀ на пѹ́ть вѣ́ченъ.
Ответы на вопросы
