Ѱало́мъ 139 MP3
1 И҆зми́ мѧ, гд҇и, ѿ человѣ́ка лѹка́ва, ѿ мѹ́жа непра́ведна и҆зба́ви мѧ̀: 2 и҆̀же помы́слиша непра́вдѹ въ се́рдцы, ве́сь де́нь ѡ҆полча́хѹ бра҄ни: 3 и҆з̾ѡстри́ша ѧ҆зы́къ сво́й ѩ҆́кѡ ѕмїи́нъ: ѩ҆́дъ а҆́спїдовъ под̾ ѹ҆стна́ми и҆́хъ. 4 Сохрани́ мѧ, гд҇и, и҆з̾ рѹкѝ грѣ́шничи, ѿ человѣ҄къ непра́ведныхъ и҆зми́ мѧ, и҆̀же помы́слиша запѧ́ти стѡпы̀ моѧ҄. 5 Скры́ша го́рдїи сѣ́ть мнѣ̀ и҆ ѹ҆́жы, препѧ́ша сѣ́ть нога́ма мои́ма: 6 при стезѝ собла́зны положи́ша мѝ. 7 Рѣ́хъ гд҇еви: бг҃ъ мо́й є҆сѝ ты̀, внѹшѝ, гд҇и, гла́съ моле́нїѧ моегѡ̀. 8 Гд҇и, гд҇и, си́ло сп҇нїѧ моегѡ̀, ѡ҆сѣни́лъ є҆сѝ над̾ главо́ю мое́ю въ де́нь бра́ни. 9 Не преда́ждь менѐ, гд҇и, ѿ жела́нїѧ моегѡ̀ грѣ́шникѹ: помы́слиша на мѧ̀, не ѡ҆ста́ви менѐ, да не когда̀ вознесѹ́тсѧ. 10 Глава̀ ѡ҆крѹже́нїѧ и҆́хъ, трѹ́дъ ѹ҆сте́нъ и҆́хъ покры́етъ ѧ҆̀. 11 Падѹ́тъ на ни́хъ ѹ҆́глїѧ ѻ҆́гнєннаѧ, низложи́ши ѧ҆̀ во страсте́хъ, и҆ не постоѧ́тъ. 12 Мѹ́жъ ѧ҆зы́ченъ не и҆спра́витсѧ на землѝ: мѹ́жа непра́ведна ѕла҄ѧ ѹ҆ловѧ́тъ во и҆стлѣ́нїе. 13 Позна́хъ, ѩ҆́кѡ сотвори́тъ гд҇ь сѹ́дъ ни́щымъ и҆ ме́сть ѹ҆бѡ́гимъ. 14 Ѻ҆ба́че првднїи и҆сповѣ́дѧтсѧ и҆́мени твоемѹ̀, и҆ вселѧ́тсѧ пра́вїи съ лице́мъ твои́мъ.
Ѱало́мъ 140 MP3
1 Гд҇и, воззва́хъ къ тебѣ̀, ѹ҆слы́ши мѧ̀: вонмѝ гла́сѹ моле́нїѧ моегѡ̀, внегда̀ воззва́ти мѝ къ тебѣ̀. 2 Да и҆спра́витсѧ моли́тва моѧ̀ ѩ҆́кѡ кади́ло пред̾ тобо́ю: воздѣѧ́нїе рѹкѹ̀ моє́ю, же́ртва вече́рнѧѧ. 3 Положѝ, гд҇и, хране́нїе ѹ҆стѡ́мъ мои҄мъ и҆ две́рь ѡ҆гражде́нїѧ ѡ҆ ѹ҆стна́хъ мои́хъ. 4 Не ѹ҆клонѝ се́рдце моѐ въ словеса̀ лѹка́вствїѧ, непщева́ти вины̀ ѡ҆ грѣсѣ́хъ съ челѡвѣ҄ки дѣ́лающими беззако́нїе: и҆ не сочтѹ́сѧ со и҆збра́нными и҆́хъ. 5 Нака́жетъ мѧ̀ првдникъ ми́лостїю и҆ ѡ҆бличи́тъ мѧ̀, є҆ле́й же грѣ́шнагѡ да не нама́ститъ главы̀ моеѧ̀: ѩ҆́кѡ є҆щѐ и҆ моли́тва моѧ̀ во благоволе́нїихъ и҆́хъ. 6 Пожє́рты бы́ша при ка́мени сѹдїи҄ и҆́хъ: ѹ҆слы́шатсѧ глагѡ́ли моѝ, ѩ҆́кѡ возмого́ша. 7 ѩ҆́кѡ то́лща землѝ просѣ́десѧ на землѝ, расточи́шасѧ кѡ́сти и҆́хъ при а҆́дѣ. 8 ѩ҆́кѡ къ тебѣ̀, гд҇и, гд҇и, ѻ҆́чи моѝ: на тѧ̀ ѹ҆пова́хъ, не ѿимѝ дѹ́шѹ мою̀: 9 сохрани́ мѧ ѿ сѣ́ти, ю҆́же соста́виша мѝ, и҆ ѿ собла҄знъ дѣ́лающихъ беззако́нїе. 10 Падѹ́тъ во мре́жѹ свою̀ грѣ҄шницы: є҆ди́нъ є҆́смъ а҆́зъ, до́ндеже прейдѹ̀.
Ответы на вопросы
